【提醒】
爸爸好吾捨得。但都開心妳有機會，有機緣開始自己過獨立生活。好想有一D提醒；比妳亦比我自己。（或者喺某一日，妳無法決定一D事情，可以攞出黎參考！）
1. 「相處」- 不可同人結怨；就算係好少事。（要結緣；多為人地設想，意識上要善良。）
2. 「處事」- 事情不可“積、拖”，要馬上解決，或馬上諗好解決方案，盡快解決。（所有事情之所以向壞方向發展，就係因為無即時解決。）
3. 「獨立」- 離開屋企，妳就係大人；唔好諗住有人會幫妳執手尾。（如果有人一旦開始幫妳執手尾，好大機會就係嫌棄妳，離棄妳徵兆。反之，識得幫別人執手尾人，先至係有能力有擔當人。）
4. 「應酬」- 除非喺十分安心，安全心態、意識之下，唔好或少飲酒。
5. 「困境」- 遇到困境，吸煙飲酒係無法度過。問題喺煙酒過後，事情仲依然會存在。當下去解決，或當下搵幫手去解決，方係上策。（就算吾成功，起碼試過。）
6. 「工作」- 吾好諗住走精面、捷徑，避過法律規條，大陸吾同香港，無情講，「大陸法」條文解釋權在政府。唔似香港，可以用律師可以用錢搞掂。（尤其依家中國政府領導層。）
7. 「學」- 要去學。。盡可能、盡能力自己做，唔好旨意他人，做一件小事，都吾簡單，要做得仔細，極致。（但係當意識到或知道自己無呢方面能力時，一定要搵識做人幫手，就算無面。需要到動用錢去，吾好孤寒，「學習」永遠都係投資，要付出方有回報，付出多回報多。免費嘢，多數都係別人做推廣至有。）
8. 「錢」- 要分得好清楚，是否關錢事？如果係錢解決吾到，一定唔好做，唔好破壞，最好唔好接觸，後患無窮！！！要有高度敏感度。
9. 「靜」- 多D留時間空間比自己 靜思，譬如打坐，做瑜珈。或者發呆，多看看天空，看看雲彩。
10. 「施、捨」- 對人要［施］，施財，哪怕是好少好少。施 時間，能力。施 自己所學。對自己［捨］捨自己貪念，自己瞋恚，怨恨憤怒妒嫉意識。「捨」自己愚癡；是非不分，黑白顛倒。「捨」自己傲慢，心中對他人的看不起，鄙視。「捨」自己對人事物的懷疑；要學會有智慧地信任。
11. 「健康」- 所謂病，源頭不外無左熱能，令身體和器官敗壞。一旦能量持續 減多而增少，最後就係熱能耗盡而死亡。故此，平日持續保持熱能，唔好流失耗費 係最重要。薑水（作用係刺激自身熱能增加劑）盡量多飲，運動（作用係製造自身熱能）盡量多做，保持身體熱能儲存。（最大可能少食藥，尤其喺大陸，藥劑量太強，極寒涼。少酒。海鮮，都極寒。）
要過得幸福哦！愛妳的爸爸咪咪。
【2021年10月11日女兒赴上海工作，上機時微信傳。】
